saDkon par ek sail-e-bala tha logon ka

saḌkoñ par ik sail-e-balā thā logoñ kā

maiñ tanhā thā us meñ kyā thā logoñ kā

duniyā thī be-faiz rifāqat kī bastī

jīvan kyā thā ik sahrā thā logoñ kā

sūd-o-ziyāñ ke mashkīze par laḌte the

dil kā dariyā suukh gayā thā logoñ kā

maiñ pahuñchā to merā naam fazā meñ thā

hañste hañste rañg uḌā thā logoñ kā

nafrat kī tahrīreñ har sū likkhī thiiñ

dīvāroñ pe rañg chaḌhā thā logoñ kā

maiñ in ko vo mujh ko dekh ke Darte the

shahr-e-sitam thā ḳhauf bajā thā logoñ kā

kuchh logoñ ne nafrat boī logoñ meñ

phir saḌkoñ par ḳhuun bahā thā logoñ kā

hañsnā bhūle hañsī uḌānā siikh liyā

pahle kab ye rañg huā thā logoñ kā

ab jo kaheñ to kis ko bāvar aa.egā

mehr-o-muravvat taur rahā thā logoñ kā

duniyā meñ thā 'ahmad' duniyā se aajiz

ḳhud ko gañvā kar soch rahā thā logoñ kā

saDkon par ek sail-e-bala tha logon ka

main tanha tha us mein kya tha logon ka

duniya thi be-faiz rifaqat ki basti

jiwan kya tha ek sahra tha logon ka

sud-o-ziyan ke mashkize par laDte the

dil ka dariya sukh gaya tha logon ka

main pahuncha to mera nam faza mein tha

hanste hanste rang uDa tha logon ka

nafrat ki tahriren har su likkhi thin

diwaron pe rang chaDha tha logon ka

main in ko wo mujh ko dekh ke Darte the

shahr-e-sitam tha KHauf baja tha logon ka

kuchh logon ne nafrat boi logon mein

phir saDkon par KHun baha tha logon ka

hansna bhule hansi uDana sikh liya

pahle kab ye rang hua tha logon ka

ab jo kahen to kis ko bawar aaega

mehr-o-murawwat taur raha tha logon ka

duniya mein tha 'ahmad' duniya se aajiz

KHud ko ganwa kar soch raha tha logon ka