saDkon pe ghumne ko nikalte hain sham se

saḌkoñ pe ghūmne ko nikalte haiñ shaam se

aaseb apne kaam se ham apne kaam se

nashshe meñ Dagmagā ke na chal sīTiyāñ bajā

shāyad koī charāġh utar aa.e baam se

dam kyā lagā liyā hai ki saare dukān-dār

chakhne meñ lag rahe haiñ mujhe tursh aam se

ġhusse meñ dauḌte haiñ Trak bhī lade hue

maiñ bhī bharā huā huuñ bahut intiqām se

dushman hai ek shaḳhs bahut ek shaḳhs kā

haañ ishq ek naam ko hai ek naam se

mere tamām aks mire karr-o-farr ke saath

maiñ ne bhī sab ko dafn kiyā dhūm-dhām se

mujh be-amal se rabt baḌhāne ko aa.e ho

ye baat hai agar to ga.e tum bhī kaam se

Dar to ye hai huī jo kabhī din kī raushnī

us raushnī meñ tum bhī lagoge avaam se

jis din se apnī baat rakhī shā.erī ke biich

maiñ kaT ke rah gayā sho.arā-e-karām se

saDkon pe ghumne ko nikalte hain sham se

aaseb apne kaam se hum apne kaam se

nashshe mein Dagmaga ke na chal siTiyan baja

shayad koi charagh utar aae baam se

dam kya laga liya hai ki sare dukan-dar

chakhne mein lag rahe hain mujhe tursh aam se

ghusse mein dauDte hain Trak bhi lade hue

main bhi bhara hua hun bahut intiqam se

dushman hai ek shaKHs bahut ek shaKHs ka

han ishq ek nam ko hai ek nam se

mere tamam aks mere karr-o-farr ke sath

main ne bhi sab ko dafn kiya dhum-dham se

mujh be-amal se rabt baDhane ko aae ho

ye baat hai agar to gae tum bhi kaam se

Dar to ye hai hui jo kabhi din ki raushni

us raushni mein tum bhi lagoge awam se

jis din se apni baat rakhi shaeri ke bich

main kaT ke rah gaya shoara-e-karam se