sadme guzre iza guzri

sadme guzre iizā guzrī

hijr meñ tere kyā kyā guzrī

hijr meñ jaan rahī yā guzrī

'riñd' kaho tum par kyā guzrī

kyā kahūñ tujh se hāl-e-furqat

guzrī jo kuchh jaanā guzrī

ulfat-e-but ne kar diyā kāfir

ye kyā bār-e-ḳhudāyā guzrī

aa.e nahīñ tum arsa guzrā

man.a kiyā kis ne kyā guzrī

guzre jis dam ham duniyā se

ham ne jaanā duniyā guzrī

bahr-e-jahāñ meñ ziist hamārī

shakl-e-habāb-e-dariyā guzrī

kis se kahiye kaun sunegā

kyā kyā guzrā kyā kyā guzrī

kahtā thā maiñ ishq se baaz aa

dekhā jo dil-e-shaidā guzrī

mar bhī ga.e ham vāh-rī ġhaflat

un ko ḳhabar bhī na aslā guzrī

ab to hai shaġhl-e-ḳhūñ-āshāmī

naubat-e-jām-o-mīnā guzrī

kāfir par bhī na guzre aisī

ham par jo but-e-tarsā guzrī

vaqt-e-marg ye jī meñ guzrā

zindagī apnī bejā guzrī

naala kaisā aah nahīñ kī

kyā kyā tujh bin iizā guzrī

TuuT chukā hai rishta-e-ulfat

yaas hai ab to tamannā guzrī

dūsrā tujh sā koī na dekhā

pesh-e-nazar ik duniyā guzrī

dekh ke hāl-e-marīz-e-furqat

hālat ham pe masīhā guzrī

qābil-e-dīd na dekhīñ āñkheñ

muddat nargis-e-shahlā guzrī

ġhash kyuuñ aayā ham se to kahiye

kyā kuchh hazrat-e-mūsā guzrī

kyūñ-kar jhelī āfat-e-furqat

'rind' kaho dil par kyā guzrī

sadme guzre iza guzri

hijr mein tere kya kya guzri

hijr mein jaan rahi ya guzri

'rind' kaho tum par kya guzri

kya kahun tujh se haal-e-furqat

guzri jo kuchh jaana guzri

ulfat-e-but ne kar diya kafir

ye kya bar-e-KHudaya guzri

aae nahin tum arsa guzra

mana kiya kis ne kya guzri

guzre jis dam hum duniya se

hum ne jaana duniya guzri

bahr-e-jahan mein zist hamari

shakl-e-habab-e-dariya guzri

kis se kahiye kaun sunega

kya kya guzra kya kya guzri

kahta tha main ishq se baz aa

dekha jo dil-e-shaida guzri

mar bhi gae hum wah-ri ghaflat

un ko KHabar bhi na asla guzri

ab to hai shaghl-e-KHun-ashami

naubat-e-jam-o-mina guzri

kafir par bhi na guzre aisi

hum par jo but-e-tarsa guzri

waqt-e-marg ye ji mein guzra

zindagi apni beja guzri

nala kaisa aah nahin ki

kya kya tujh bin iza guzri

TuT chuka hai rishta-e-ulfat

yas hai ab to tamanna guzri

dusra tujh sa koi na dekha

pesh-e-nazar ek duniya guzri

dekh ke haal-e-mariz-e-furqat

haalat hum pe masiha guzri

qabil-e-did na dekhin aankhen

muddat nargis-e-shahla guzri

ghash kyun aaya hum se to kahiye

kya kuchh hazrat-e-musa guzri

kyun-kar jheli aafat-e-furqat

'rind' kaho dil par kya guzri