safai uski jhalakti hai gore sine mein

safā.ī us kī jhalaktī hai gore siine meñ

chamak kahāñ hai ye almās ke nagīne meñ

na tuuī hai na kanārī na gokhrū tis par

sajī hai shoḳh ne añgiyā bunat ke miine meñ

jo pūchhā maiñ ''kahāñ thī'' tū hañs ke yuuñ bolī

''maiñ lag rahī thī us añgiyā muī ke siine meñ''

paḌā jo haath mirā siine par to haath jhaTak

pukārī! ''aag lage uuī is qarīne meñ''

jo aisā hī hai to ab ham na roz āveñge

kabhū jo aa.e to hafte meñ yā mahīne meñ

kabhū maTak kabhī bas bas kabhū piyāla paTak

dimāġh kartī thī kyā kyā sharāb piine meñ

chaḌhī jo dauḌ ke koThe pe vo parī ik baar

to maiñ ne jā liyā us ko udhar ke ziine meñ

vo pahnā kartī thī añgiyā jo surḳh laahī kī

lipaT ke tan se vo tar ho ga.ī pasīne meñ

ye surḳh añgiyā jo dekhī hai us parī kī 'nazīr'

mujhe to aag sī kuchh lag rahī hai siine meñ

safai us ki jhalakti hai gore sine mein

chamak kahan hai ye almas ke nagine mein

na tui hai na kanari na gokhru tis par

saji hai shoKH ne angiya bunat ke mine mein

jo puchha main kahan thi tu hans ke yun boli

main lag rahi thi us angiya mui ke sine mein

paDa jo hath mera sine par to hath jhaTak

pukari! aag lage ui is qarine mein

jo aisa hi hai to ab hum na roz aawenge

kabhu jo aae to hafte mein ya mahine mein

kabhu maTak kabhi bas bas kabhu piyala paTak

dimagh karti thi kya kya sharab pine mein

chaDhi jo dauD ke koThe pe wo pari ek bar

to main ne ja liya us ko udhar ke zine mein

wo pahna karti thi angiya jo surKH lahi ki

lipaT ke tan se wo tar ho gai pasine mein

ye surKH angiya jo dekhi hai us pari ki 'nazir'

mujhe to aag si kuchh lag rahi hai sine mein