safar ka ek naya silsila banana hai

safar kā ek nayā silsila banānā hai

ab āsmān talak rāsta banānā hai

talāshte haiñ abhī ham-safar bhī kho.e hue

ki manziloñ se udhar rāsta banānā hai

sameTnā hai abhī harf harf husn tirā

ġhazal ko apnī tirā ā.īna banānā hai

mujhe ye zid hai kabhī chāñd ko asiir karūñ

so ab ke jhiil meñ ik dā.era banānā hai

sukūt-e-shām-e-alam tū hī kuchh batā ki tujhe

kahāñ pe ḳhvāb kahāñ rat-jagā banānā hai

usī ko aañkh meñ tasvīr karte rahte haiñ

ab us se haT ke hameñ aur kyā banānā hai

dar-e-havas pe kahāñ tak jhukā.eñ sar 'shahbāz'

zarūratoñ ko kahāñ tak ḳhudā banānā hai

safar ka ek naya silsila banana hai

ab aasman talak rasta banana hai

talashte hain abhi ham-safar bhi khoe hue

ki manzilon se udhar rasta banana hai

sameTna hai abhi harf harf husn tera

ghazal ko apni tera aaina banana hai

mujhe ye zid hai kabhi chand ko asir karun

so ab ke jhil mein ek daera banana hai

sukut-e-sham-e-alam tu hi kuchh bata ki tujhe

kahan pe KHwab kahan rat-jaga banana hai

usi ko aankh mein taswir karte rahte hain

ab us se haT ke hamein aur kya banana hai

dar-e-hawas pe kahan tak jhukaen sar 'shahbaz'

zaruraton ko kahan tak KHuda banana hai