سفر کے باب میں شامل ہوا اک نا سفر میں بھی

سفر کے باب میں شامل ہوا اک نا سفر میں بھی

بہکتی آندھیاں ہیں اور چراغ رہ گزر میں بھی

ادھر بھی کوئی سوزش کوئی صدمہ شور آسا ہے

سکوت بے حمیت سے پریشاں ہوں ادھر میں بھی

عجب ہے مرحلہ یارو طلسم نارسائی کا

جو ٹوٹے گا یہ سناٹا تو جاؤں گا بکھر میں بھی

سر مژگاں لہو کی پیش قدمی رنگ لائی ہے

کہ ہوں اب حلقۂ دیدہ وراں میں اک خبر میں بھی

ذرا دیکھوں سوال وصل پر کیا رنگ ہو ان کا

ترے ہی ساتھ چلتا ہوں ٹھہر اے نامہ بر میں بھی

تمہارے ہی تنفس سے یہ صبحیں سانس لیتی ہیں

تمہارے لمس سے روشن ہیں یہ شمس و قمر میں بھی

یہاں ہر ہر قدم عبرت کدے ہیں دیدۂ بینا

ھڑپہ مصر بابل نینوا ار کاشغر میں بھی