safar ke tajrabon mein gard-e-pa bhi aa hi jati hai

safar ke tajraboñ meñ gard-e-pā bhī aa hī jaatī hai

magar us pech-o-ḳham se kuchh jilā bhī aa hī jaatī hai

jo chaltā huuñ falak se ḳhuuñ ke favvāre baraste haiñ

jo ruktā huuñ samūm-e-fitna-zā bhī aa hī jaatī hai

ḳhirad kī saañs bhī ruk jaatī hai tīra-ḳhayālī se

tah-e-ehsās nādīda balā bhī aa hī jaatī hai

jo paude sahn meñ khilte haiñ un ko dhuup lagtī hai

daraḳhtoñ se tar-o-tāza havā bhī aa hī jaatī hai

hare rah jā.eñge jāñ-dār patte zard mausam meñ

ḳhizāñ-baḳhtī meñ jiine kī adā bhī aa hī jaatī hai

unhīñ se qarya-e-jāñ meñ vufūr-e-dard hotā hai

unhīñ nazroñ meñ tāsīr-e-shifā bhī aa hī jaatī hai

safar ke tajrabon mein gard-e-pa bhi aa hi jati hai

magar us pech-o-KHam se kuchh jila bhi aa hi jati hai

jo chalta hun falak se KHun ke fawware baraste hain

jo rukta hun samum-e-fitna-za bhi aa hi jati hai

KHirad ki sans bhi ruk jati hai tira-KHayali se

tah-e-ehsas nadida bala bhi aa hi jati hai

jo paude sahn mein khilte hain un ko dhup lagti hai

daraKHton se tar-o-taza hawa bhi aa hi jati hai

hare rah jaenge jaan-dar patte zard mausam mein

KHizan-baKHti mein jine ki ada bhi aa hi jati hai

unhin se qarya-e-jaan mein wufur-e-dard hota hai

unhin nazron mein tasir-e-shifa bhi aa hi jati hai