safar ke tasawwur se sahma hua hun

safar ke tasavvur se sahmā huā huuñ

baḌī der se yuuñ hī Thahrā huā huuñ

udhar Dūbte jā rahe haiñ sitāre

idhar maiñ ḳhayāloñ meñ uljhā huā huuñ

jalāne ke qābil na likhne ke laa.eq

maiñ kāġhaz huuñ saada pa bhīgā huā huuñ

sambhāle huuñ ḳhud ko baḌī kāvishoñ se

mujhe chhū na lenā maiñ chaTḳhā huā huuñ

musalsal paḌī hai kaḌī dhuup mujh par

mirā rañg dekho maiñ kaisā huā huuñ

na baaqī hai saaya na barg-o-samar haiñ

maiñ mausam kī sāzish kā maarā huā huuñ

thameñgī kabhī to muḳhālif havā.eñ

yahī soch kar ḳhud meñ simTā huā huuñ

safar ke tasawwur se sahma hua hun

baDi der se yun hi Thahra hua hun

udhar Dubte ja rahe hain sitare

idhar main KHayalon mein uljha hua hun

jalane ke qabil na likhne ke laeq

main kaghaz hun sada pa bhiga hua hun

sambhaale hun KHud ko baDi kawishon se

mujhe chhu na lena main chaTKHa hua hun

musalsal paDi hai kaDi dhup mujh par

mera rang dekho main kaisa hua hun

na baqi hai saya na barg-o-samar hain

main mausam ki sazish ka mara hua hun

thamengi kabhi to muKHalif hawaen

yahi soch kar KHud mein simTa hua hun