safar ki dhup ne chehra ujal rakkha tha

safar kī dhuup ne chehra ujaal rakkhā thā

vo mar gayā to sirhāne visāl rakkhā thā

hasīn chehre kashīda kiye the miTTī se

balā kā ḳhaak meñ husn o jamāl rakkhā thā

vo hāshiyoñ meñ tire surmagīñ mohabbat thī

ki ā.inoñ meñ koī aks Daal rakkhā thā

falak kī saañs ukhaḌne lagī to raaz khulā

ki āsmāñ ko zamīñ ne sambhāl rakkhā thā

tirā uruuj thā sūraj ke maand paḌne tak

mire nasīb meñ shab sā zavāl rakkhā thā

hisār-e-ḳhvāb se bāhar kabhī nikal na sakūñ

bichhā ke raah meñ palkoñ kā jaal rakkhā thā

vo ek shaḳhs jo vaqt-e-zavāl mujh se milā

sunahrī āñkhoñ meñ us kī malāl rakkhā thā

kisī ko sahrā-navardī se ishq lāhaq thā

kisī ko shauq ne ghar se nikāl rakkhā thā

usī ne zahr uñDelā hai merī nas nas meñ

jo āstīn meñ ik saañp paal rakkhā thā

safar ki dhup ne chehra ujal rakkha tha

wo mar gaya to sirhane visal rakkha tha

hasin chehre kashida kiye the miTTi se

bala ka KHak mein husn o jamal rakkha tha

wo hashiyon mein tere surmagin mohabbat thi

ki aainon mein koi aks Dal rakkha tha

falak ki sans ukhaDne lagi to raaz khula

ki aasman ko zamin ne sambhaal rakkha tha

tera uruj tha suraj ke mand paDne tak

mere nasib mein shab sa zawal rakkha tha

hisar-e-KHwab se bahar kabhi nikal na sakun

bichha ke rah mein palkon ka jal rakkha tha

wo ek shaKHs jo waqt-e-zawal mujh se mila

sunahri aankhon mein us ki malal rakkha tha

kisi ko sahra-nawardi se ishq lahaq tha

kisi ko shauq ne ghar se nikal rakkha tha

usi ne zahr unDela hai meri nas nas mein

jo aastin mein ek sanp pal rakkha tha