سفر کی رات ہے دریا کو پار کرنا ہے

سفر کی رات ہے دریا کو پار کرنا ہے

سفینہ ڈوب گیا ہے مجھے ابھرنا ہے

تمہارے بعد ابھی ان شکستہ قدموں سے

پہاڑ چڑھنے ہیں دریاؤں میں اترنا ہے

وہ سنگ دل جو ابھی رو پڑا تو علم ہوا

کہ اس پہاڑ کے سینہ میں ایک جھرنا ہے

میں خوش لباس سمجھ کر پہن رہی ہوں کفن

میں زندگی ہوں مرا کام رنگ بھرنا ہے

مٹانا خود ہے مجھے اپنے اندروں کا شور

مگر یہ کام بہت خاموشی سے کرنا ہے

مٹا رہی ہوں چٹخ رنگ سب شبیہ کے میں

کہ کینوس کو بہت سادگی سے بھرنا ہے

کسی کی موت پہ اکثر یہ سوچتی ہوں میں

مجھے بھی کل کو اسی راہ سے گزرنا ہے