safar ki raat hai dariya ko par karna hai

safar kī raat hai dariyā ko paar karnā hai

safīna Duub gayā hai mujhe ubharnā hai

tumhāre baa'd abhī in shikasta qadmoñ se

pahāḌ chaḌhne haiñ dariyāoñ meñ utarnā hai

vo sang-dil jo abhī ro paḌā to ilm huā

ki is pahāḌ ke siine meñ ek jharnā hai

maiñ ḳhush-libās samajh kar pahan rahī huuñ kafan

maiñ zindagī huuñ mirā kaam rang bharnā hai

miTānā ḳhud hai mujhe apne andarūñ kā shor

magar ye kaam bahut ḳhāmoshī se karnā hai

miTā rahī huuñ chaTaḳh rang sab shabīh ke maiñ

ki canvas ko bahut sādgī se bharnā hai

kisī kī maut pe aksar ye sochtī huuñ maiñ

mujhe bhī kal ko usī raah se guzarnā hai

safar ki raat hai dariya ko par karna hai

safina Dub gaya hai mujhe ubharna hai

tumhaare ba'd abhi in shikasta qadmon se

pahaD chaDhne hain dariyaon mein utarna hai

wo sang-dil jo abhi ro paDa to ilm hua

ki is pahaD ke sine mein ek jharna hai

main KHush-libas samajh kar pahan rahi hun kafan

main zindagi hun mera kaam rang bharna hai

miTana KHud hai mujhe apne andarun ka shor

magar ye kaam bahut KHamoshi se karna hai

miTa rahi hun chaTaKH rang sab shabih ke main

ki canwas ko bahut sadgi se bharna hai

kisi ki maut pe aksar ye sochti hun main

mujhe bhi kal ko usi rah se guzarna hai