سفر کی شام تھکن بے پناہ تھی میری

سفر کی شام تھکن بے پناہ تھی میری

کنار آب رواں خیمہ گاہ تھی میری

افق سے روزن تاریک کھینچتا تھا مجھے

میں بے چراغ تھا اور شب سیاہ تھی میری

نشیب جاں میں اترتا ہوں جس کی چوٹی سے

اسی پہاڑ پہ اک خانقاہ تھی میری

مرا یہ زعم کہ مجھ پر روا ہے خوں اس کا

کنیز شوخ مگر بے گناہ تھی میری

شکستگی میں گراتا رہا میں خشت بہ خشت

مرا بدن تھا کہ اک سد راہ تھی میری

قدیم آگ سے آتش کدہ کیا روشن

ہوائے تند بڑی خیر خواہ تھی میری

میں ایک عمر اٹھاتا رہا سکوت کا بوجھ

دبی ہوئی مرے اندر کراہ تھی میری