safar ki zulmaton mein ye sitara chahiye mujhko

safar kī zulmatoñ meñ ye sitāra chāhiye mujh ko

abhī terī mohabbat kā sahārā chāhiye mujh ko

koī taaza bahut taaza nazar kā zāviya mil jaa.e

koī raushan bahut raushan nazāra chāhiye mujh ko

mire alfāz kī jholī kahīñ ḳhālī na rah jaa.e

ye jo sarmāya-e-ġham hai ye saarā chāhiye mujh ko

koī barsāt kā bādal yahāñ bār-e-digar aa.e

dhanak jaisā koī lamha dubāra chāhiye mujh ko

ḳhudā-e-bahr mujh ko pāniyoñ meñ saañs dī tuuñ ne

magar ab is samundar se kināra chāhiye mujh ko

abhī to ik sitāre par qadam maiñ ne jamā.e haiñ

abhī to āsmāñ saare kā saarā chāhiye mujh ko

tirī ḳhvāhish ke āñgan meñ ho mere pyaar kī chhāyā

mukammal is havelī par ijārā chāhiye mujh ko

abhī 'zahrāb' us ko dekhtā huuñ chashm-e-hairat se

abhī dariyā-e-hairat kā kināra chāhiye mujh ko

safar ki zulmaton mein ye sitara chahiye mujh ko

abhi teri mohabbat ka sahaara chahiye mujh ko

koi taza bahut taza nazar ka zawiya mil jae

koi raushan bahut raushan nazara chahiye mujh ko

mere alfaz ki jholi kahin KHali na rah jae

ye jo sarmaya-e-gham hai ye sara chahiye mujh ko

koi barsat ka baadal yahan bar-e-digar aae

dhanak jaisa koi lamha dubara chahiye mujh ko

KHuda-e-bahr mujh ko paniyon mein sans di tun ne

magar ab is samundar se kinara chahiye mujh ko

abhi to ek sitare par qadam main ne jamae hain

abhi to aasman sare ka sara chahiye mujh ko

teri KHwahish ke aangan mein ho mere pyar ki chhaya

mukammal is haweli par ijara chahiye mujh ko

abhi 'zahrab' us ko dekhta hun chashm-e-hairat se

abhi dariya-e-hairat ka kinara chahiye mujh ko