safar mein ab bhi aadatan sarab dekhta hun main

safar meñ ab bhī ādatan sarāb dekhtā huuñ maiñ

qarīb-e-marg zindagī ke ḳhvāb dekhtā huuñ maiñ

havā ne harf-e-sāda mere zehn se uḌā liyā

to ab har ek baat par kitāb dekhtā huuñ maiñ

bahār kī savāriyoñ ke ham-rikāb kyuuñ rahe

ḳhizāñ kā barg-o-bār par itaab dekhtā huuñ maiñ

khaḌā huuñ nok-e-ḳhār par gumān-dar-gumān par

khulegā kab haqīqatoñ kā baab dekhtā huuñ maiñ

ajiib us kī sarvarī na.ī hai shaan har ghaḌī

banoñ meñ shahr, shahr meñ sarāb dekhtā huuñ maiñ

nazar-fareb Dhañg haiñ sitamgaroñ ke rañg haiñ

nigah meñ qahr haath meñ gulāb dekhtā huuñ maiñ

ġhazal se chheḌ-chhāḌ ko gunāh jāntā thā maiñ

magar ab is gunāh meñ savāb dekhtā huuñ maiñ

'suhail' shaam Dhal ga.ī dukān apnī baḌh ga.ī

zarā sī raushnī hai aur hisāb dekhtā huuñ maiñ

safar mein ab bhi aadatan sarab dekhta hun main

qarib-e-marg zindagi ke KHwab dekhta hun main

hawa ne harf-e-sada mere zehn se uDa liya

to ab har ek baat par kitab dekhta hun main

bahaar ki sawariyon ke ham-rikab kyun rahe

KHizan ka barg-o-bar par itab dekhta hun main

khaDa hun nok-e-KHar par guman-dar-guman par

khulega kab haqiqaton ka bab dekhta hun main

ajib us ki sarwari nai hai shan har ghaDi

banon mein shahr, shahr mein sarab dekhta hun main

nazar-fareb Dhang hain sitamgaron ke rang hain

nigah mein qahr hath mein gulab dekhta hun main

ghazal se chheD-chhaD ko gunah jaanta tha main

magar ab is gunah mein sawab dekhta hun main

'suhail' sham Dhal gai dukan apni baDh gai

zara si raushni hai aur hisab dekhta hun main