safar mein ab ke ajab tajraba nikal aaya

safar meñ ab ke ajab tajraba nikal aayā

bhaTak gayā to nayā rāsta nikal aayā

mere hī naam kī taḳhtī lagī thī jis dar par

vo jab khulā to kisī aur kā nikal aayā

dukhoñ kī jhāḌiyāñ ugtī chalī ga.iiñ dil meñ

har ek jhāḌī se jañgal ghanā nikal aayā

ik aur naam juḌā dushmanoñ ke nāmoñ meñ

ik aur dost mirā ā.īna nikal aayā

kuchh aaj ashkoñ kī lazzat na.ī na.ī sī hai

purāne ġham kā nayā zā.iqa nikal aayā

ye merā aks hai yā aur hai koī mujh meñ

ki jis kā qad mire qad se baḌā nikal aayā

baḌhe kuchh is tarah donoñ hī dostī kī taraf

ki darmiyāñ meñ nayā fāsla nikal aayā

duā salām se aage jo thoḌī baat baḌhī

jo us kā dukh thā vahī dukh mirā nikal aayā

mirī ġhazal meñ kisī bevafā kā zikr na thā

na jaane kaise tirā tazkira nikal aayā

safar mein ab ke ajab tajraba nikal aaya

bhaTak gaya to naya rasta nikal aaya

mere hi nam ki taKHti lagi thi jis dar par

wo jab khula to kisi aur ka nikal aaya

dukhon ki jhaDiyan ugti chali gain dil mein

har ek jhaDi se jangal ghana nikal aaya

ek aur nam juDa dushmanon ke namon mein

ek aur dost mera aaina nikal aaya

kuchh aaj ashkon ki lazzat nai nai si hai

purane gham ka naya zaiqa nikal aaya

ye mera aks hai ya aur hai koi mujh mein

ki jis ka qad mere qad se baDa nikal aaya

baDhe kuchh is tarah donon hi dosti ki taraf

ki darmiyan mein naya fasla nikal aaya

dua salam se aage jo thoDi baat baDhi

jo us ka dukh tha wahi dukh mera nikal aaya

meri ghazal mein kisi bewafa ka zikr na tha

na jaane kaise tera tazkira nikal aaya