safar mein ab nahin par aabla-pai nahin jati

safar meñ ab nahīñ par ābla-pā.ī nahīñ jaatī

hamārī rāstoñ se yuuñ shanāsā.ī nahīñ jaatī

raheñ ham mahfiloñ meñ yā raheñ duniyā ke mele meñ

akelā chhoḌ kar lekin ye tanhā.ī nahīñ jaatī

nigāhoñ ke ishāre bhī mohabbat bhī alāmat haiñ

sabhī bāteñ zabānī hī to batlā.ī nahīñ jaatī

baḌī nāzuk sī hai Dorī ye rishtoñ kī batā.ūñ kyā

ulajh ik baar gir jaa.e to suljhā.ī nahīñ jaatī

lagā.e koī bhī kitne yahāñ chehroñ pe chehre hī

haqīqat aa.ine se phir bhī jhuTlā.ī nahīñ jaatī

na jaane ḳhvāb haiñ kitne tamannā.eñ khilaunoñ sī

magar ye zindagī un se to bahlā.ī nahīñ jaatī

kahānī zindagī kī yuuñ to dilkash hai magar 'vāhid'

koī ik baar jo paḌh le to dohrā.ī nahīñ jaatī

safar mein ab nahin par aabla-pai nahin jati

hamari raston se yun shanasai nahin jati

rahen hum mahfilon mein ya rahen duniya ke mele mein

akela chhoD kar lekin ye tanhai nahin jati

nigahon ke ishaare bhi mohabbat bhi alamat hain

sabhi baaten zabani hi to batlai nahin jati

baDi nazuk si hai Dori ye rishton ki bataun kya

ulajh ek bar gir jae to suljhai nahin jati

lagae koi bhi kitne yahan chehron pe chehre hi

haqiqat aaine se phir bhi jhuTlai nahin jati

na jaane KHwab hain kitne tamannaen khilaunon si

magar ye zindagi un se to bahlai nahin jati

kahani zindagi ki yun to dilkash hai magar 'wahid'

koi ek bar jo paDh le to dohrai nahin jati