safar mein koi rukawaT nahin gada ke liye

safar meñ koī rukāvaT nahīñ gadā ke liye

khulā huā hai har ik rāsta havā ke liye

ye pūchhtī hai har ik sub.h aa ke mauj-e-nasīm

koī payām kisī yār-e-āshnā ke liye

tavāf-e-dair-o-haram se to ho chuke fāriġh

chalo ziyārat-e-yārān-e-bā-safā ke liye

maiñ kyuuñ na bā-sar-e-uryāñ phirūñ tah-e-aflāk

ki faḳhr hai sar-e-uryāñ barahna-pā ke liye

ye shahr shahr-e-baḳhīlāñ hai ai dil-e-bīmār

yahāñ to zahr bhī miltā nahīñ davā ke liye

shikār DhūñDh ke laa.ī kahāñ kahāñ kahāñ se hayāt

darinda-e-ajal-o-azdar-e-qazā ke liye

ajiib baat ki manzil kā jab bhī qasd huā

bajā.e paañv ke haath uTh ga.e duā ke liye

sitam-zarīf zamāne ne chun liyā ham ko

girānī-e-nafs-o-garmī-e-navā ke liye

sivā.e kashtī-e-lañgar gusistā kyā hogī

ġharīq-e-bahr kī sauġhāt nā-ḳhudā ke liye

hamīñ meñ kyuuñ hadaf-e-tanz ai jamāl-e-bahār

sabhī ne phuul chune the tirī qabā ke liye

na zād-e-rāh na rahbar na mezbāñ na sarā.e

ham aise bādiya-gardān-e-be-navā ke liye

jahāñ jahāñ bhī hue par-kushā ham ahl-e-zamīñ

zamīñ ke bojh hī sābit hue ḳhalā ke liye

safar mein koi rukawaT nahin gada ke liye

khula hua hai har ek rasta hawa ke liye

ye puchhti hai har ek subh aa ke mauj-e-nasim

koi payam kisi yar-e-ashna ke liye

tawaf-e-dair-o-haram se to ho chuke farigh

chalo ziyarat-e-yaran-e-ba-safa ke liye

main kyun na ba-sar-e-uryan phirun tah-e-aflak

ki faKHr hai sar-e-uryan barahna-pa ke liye

ye shahr shahr-e-baKHilan hai ai dil-e-bimar

yahan to zahr bhi milta nahin dawa ke liye

shikar DhunDh ke lai kahan kahan kahan se hayat

darinda-e-ajal-o-azdar-e-qaza ke liye

ajib baat ki manzil ka jab bhi qasd hua

bajae panw ke hath uTh gae dua ke liye

sitam-zarif zamane ne chun liya hum ko

girani-e-nafs-o-garmi-e-nawa ke liye

siwae kashti-e-langar gusista kya hogi

ghariq-e-bahr ki saughat na-KHuda ke liye

hamin mein kyun hadaf-e-tanz ai jamal-e-bahaar

sabhi ne phul chune the teri qaba ke liye

na zad-e-rah na rahbar na mezban na sarae

hum aise baadiya-gardan-e-be-nawa ke liye

jahan jahan bhi hue par-kusha hum ahl-e-zamin

zamin ke bojh hi sabit hue KHala ke liye