سفر میں ذات کے اک حرف آرزو کے سوا

سفر میں ذات کے اک حرف آرزو کے سوا

کسی سے کام نہ رکھ اپنی جستجو کے سوا

میں ایسے شخص سے کوئی کلام کیا کرتا

وہ شخص بات ہی کرتا نہیں ہے تو کے سوا

پھٹی پھٹی سی انہی چادروں کو سینا ہے

نہیں ہے اب کوئی صورت فقط رفو کے سوا

میں ہو گیا ہوں مقابل اب آپ اپنے ہی

نہیں ہے راہ کوئی جنگ دو بدو کے سوا

مری حیات کی تفسیر آب و گل ہی نہیں

کچھ اور بھی ہے مری ذات میں نمو کے سوا

انہیں بھی کیجیے اپنی زبان میں داخل

کلام میرؔ میں جو لفظ ہیں کسو کے سوا

ہر ایک معرکۂ ذہن و فکر میں وصفیؔ

نہ آیا کام ہی کوئی مرے لہو کے سوا