safar mein zat ke ek harf-e-arzu ke siwa

safar meñ zaat ke ik harf-e-ārzū ke sivā

kisī se kaam na rakh apnī justujū ke sivā

maiñ aise shaḳhs se koī kalām kyā kartā

vo shaḳhs baat hī kartā nahīñ hai tū ke sivā

phaTī phaTī sī inhī chādaroñ ko siinā hai

nahīñ hai ab koī sūrat faqat rafū ke sivā

maiñ ho gayā huuñ muqābil ab aap apne hī

nahīñ hai raah koī jang-e-dū-badū ke sivā

mirī hayāt kī tafsīr āb-o-gil hī nahīñ

kuchh aur bhī hai mirī zaat meñ numū ke sivā

unheñ bhī kījiye apnī zabān meñ dāḳhil

kalām-e-'mīr' meñ jo lafz haiñ kisū ke sivā

har ek mā'raka-e-zehn-o-fikr meñ 'vasfī'

na aayā kaam hī koī mire lahū ke sivā

safar mein zat ke ek harf-e-arzu ke siwa

kisi se kaam na rakh apni justuju ke siwa

main aise shaKHs se koi kalam kya karta

wo shaKHs baat hi karta nahin hai tu ke siwa

phaTi phaTi si inhi chadaron ko sina hai

nahin hai ab koi surat faqat rafu ke siwa

main ho gaya hun muqabil ab aap apne hi

nahin hai rah koi jang-e-du-badu ke siwa

meri hayat ki tafsir aab-o-gil hi nahin

kuchh aur bhi hai meri zat mein numu ke siwa

unhen bhi kijiye apni zaban mein daKHil

kalam-e-'mir' mein jo lafz hain kisu ke siwa

har ek ma'raka-e-zehn-o-fikr mein 'wasfi'

na aaya kaam hi koi mere lahu ke siwa