safar mujh par ajab barpa rahi hai

safar mujh par ajab barpā rahī hai

mirī vahshat mujhe chauñkā rahī hai

kahīñ se aa rahī hai terī ḳhushbū

udāsī duur hotī jā rahī hai

abhī tak ḳhud nahīñ samjhī hai jis ko

mujhe vo baat bhī samjhā rahī hai

amīroñ ke bache TukḌoñ ko chun kar

ġharībī bhuuk ko bahlā rahī hai

mubārak shaam kī aamad mubārak

kisī kī yaad le kar aa rahī hai

ga.ī shab aañkh meñ jo mar gayā thā

udāsī ḳhvāb vo sahlā rahī hai

bahut maġhrūr hai ye bādshāhī

hamāre ishq ko chunvā rahī hai

daraḳhtoñ par na.e zevar uge haiñ

zamīñ dulhan banī sharmā rahī hai

hamāre darmiyāñ alfāz gum haiñ

''ḳhamoshī uñgliyāñ chaTḳhā rahī''

bahut ummīd thī is zindagī se

magar ummīd ye murjhā rahī hai

'ziyā' jalva hai 'nāsir-kāzmī' kā

ġhazal ye ḳhud mujhe taḌpā rahī hai

safar mujh par ajab barpa rahi hai

meri wahshat mujhe chaunka rahi hai

kahin se aa rahi hai teri KHushbu

udasi dur hoti ja rahi hai

abhi tak KHud nahin samjhi hai jis ko

mujhe wo baat bhi samjha rahi hai

amiron ke bache TukDon ko chun kar

gharibi bhuk ko bahla rahi hai

mubarak sham ki aamad mubarak

kisi ki yaad le kar aa rahi hai

gai shab aankh mein jo mar gaya tha

udasi KHwab wo sahla rahi hai

bahut maghrur hai ye baadshahi

hamare ishq ko chunwa rahi hai

daraKHton par nae zewar uge hain

zamin dulhan bani sharma rahi hai

hamare darmiyan alfaz gum hain

KHamoshi ungliyan chaTKHa rahi

bahut ummid thi is zindagi se

magar ummid ye murjha rahi hai

'ziya' jalwa hai 'nasir-kazmi' ka

ghazal ye KHud mujhe taDpa rahi hai