سفر پر ہمیں ہم سفر چاہیئے تھا

سفر پر ہمیں ہم سفر چاہیئے تھا

برا ہو بھلا ہو مگر چاہیئے تھا

جہاں سے تجھے بس تجھے دیکھتے ہم

اک ایسا ہمیں بھی تو گھر چاہیئے تھا

لگایا نہیں دل سے میں نے ابھی تک

وہ غم جو ترے جانے پر چاہیئے تھا

لو سانچے میں ڈھلنے لگا ہے تخیل

ہمیں سوچنا سوچ کر چاہیئے تھا

دعائیں وفائیں ادائیں محبت

ہمیں اور کیا رات بھر چاہیئے تھا

تمہیں کیا بتاؤں بتاؤ رقیبو

وہ جو تھا مجھے کس قدر چاہیئے تھا

جو پھرتا رہا دل کی گلیوں میں ساحلؔ

اسے دل نہیں میرا سر چاہیئے تھا