safar par hamein ham-safar chahiye tha

safar par hameñ ham-safar chāhiye thā

burā ho bhalā ho magar chāhiye thā

jahāñ se tujhe bas tujhe dekhte ham

ik aisā hameñ bhī to ghar chāhiye thā

lagāyā nahīñ dil se maiñ ne abhī tak

vo ġham jo tire jaane par chāhiye thā

lo sāñche meñ Dhalne lagā hai taḳhayyul

hameñ sochnā soch kar chāhiye thā

du'ā.eñ vafā.eñ adā.eñ mohabbat

hameñ aur kyā rāt-bhar chāhiye thā

tumheñ kyā batā.ūñ batāo raqībo

vo jo thā mujhe kis qadar chāhiye thā

jo phirtā rahā dil kī galiyoñ meñ 'sāhil'

use dil nahīñ merā sar chāhiye thā

safar par hamein ham-safar chahiye tha

bura ho bhala ho magar chahiye tha

jahan se tujhe bas tujhe dekhte hum

ek aisa hamein bhi to ghar chahiye tha

lagaya nahin dil se main ne abhi tak

wo gham jo tere jaane par chahiye tha

lo sanche mein Dhalne laga hai taKHayyul

hamein sochna soch kar chahiye tha

du'aen wafaen adaen mohabbat

hamein aur kya raat-bhar chahiye tha

tumhein kya bataun batao raqibo

wo jo tha mujhe kis qadar chahiye tha

jo phirta raha dil ki galiyon mein 'sahil'

use dil nahin mera sar chahiye tha