sah-sah ke gham ke war ghazal kah raha hun main

sah-sah ke ġham ke vaar ġhazal kah rahā huuñ maiñ

phir ye ki shāhkār ġhazal kah rahā huuñ maiñ

ruk jā ġham-e-jahāñ dar-e-dil par sadā na de

huuñ mahv-e-yād-e-yār ġhazal kah rahā huuñ maiñ

aise meñ ġham-gusārī bhī ḳhātir pe baar hai

ai mere ġham-gusār ġhazal kah rahā huuñ maiñ

āsūda huuñ ki aaj dil-e-zaḳhm-zaḳhm se

siina hai lāla-zār ġhazal kah rahā huuñ maiñ

afsurda huuñ ḳhizāñ ke pur-āshob daur meñ

phir bhī sadā-bahār ġhazal kah rahā huuñ maiñ

lekin bayān terā sarāpā na kar sakā

jān-e-ġhazal hazār ġhazal kah rahā huuñ maiñ

mā.il-ba-lutf kaash vo jān-e-ġhazal bhī ho

jis ke liye 'vaqār' ġhazal kah rahā huuñ maiñ

sah-sah ke gham ke war ghazal kah raha hun main

phir ye ki shahkar ghazal kah raha hun main

ruk ja gham-e-jahan dar-e-dil par sada na de

hun mahw-e-yaad-e-yar ghazal kah raha hun main

aise mein gham-gusari bhi KHatir pe bar hai

ai mere gham-gusar ghazal kah raha hun main

aasuda hun ki aaj dil-e-zaKHm-zaKHm se

sina hai lala-zar ghazal kah raha hun main

afsurda hun KHizan ke pur-ashob daur mein

phir bhi sada-bahaar ghazal kah raha hun main

lekin bayan tera sarapa na kar saka

jaan-e-ghazal hazar ghazal kah raha hun main

mail-ba-lutf kash wo jaan-e-ghazal bhi ho

jis ke liye 'waqar' ghazal kah raha hun main