سہہ سہہ کے ستم مٹ جانے میں کیا کار نمایاں ہوتے ہیں

سہہ سہہ کے ستم مٹ جانے میں کیا کار نمایاں ہوتے ہیں

وہ جتنے پشیماں ہوتے ہیں اور عشق پہ احساں ہوتے ہیں

ہم سوختہ سامانوں کے وہ اجزائے پریشاں ہوتے ہیں

جو برق و شرار و شبنم و گل بن بن کے نمایاں ہوتے ہیں

میں پیکر خاکی ہوں لیکن یہ خاک کچھ ایسی رنگیں ہے

جس خاک کے ذرے ذرے سے تعمیر گلستاں ہوتے ہیں

شیشوں کی صدائے قلقل پر ہے خم کی جواباً حق حق بھی

اللہ رے کیا میخانے کے اسرار نمایاں ہوتے ہیں

تقدیر کا رونا روتا ہے کوتاہ خیال و تنگ نظر

بیدار عزائم کے صدقے جو کام ہیں آساں ہوتے ہیں

مشہور ہوں بزم گیتی میں اس فن میں مصورؔ کامل ہوں

تصویر سے ظاہر کرتا ہوں وہ جلوے جو پنہاں ہوتے ہیں