sah sah ke sitam miT jaane mein kya kar-e-numayan hote hain

sah sah ke sitam miT jaane meñ kyā kār-e-numāyāñ hote haiñ

vo jitne pashemāñ hote haiñ aur ishq pe ehsāñ hote haiñ

ham soḳhta-sāmānoñ ke vo ajzā-e-pareshāñ hote haiñ

jo barq-o-sharār-o-shabnam-o-gul ban ban ke numāyāñ hote haiñ

maiñ paikar-e-ḳhākī huuñ lekin ye ḳhaak kuchh aisī rangīñ hai

jis ḳhaak ke zarre zarre se ta.amīr gulistāñ hote haiñ

shīshoñ kī sadā-e-qulqul par hai ḳhum kī javāban haq-haq bhī

allāh re kyā maiḳhāne ke asrār numāyāñ hote haiñ

taqdīr kā ronā rotā hai kotāh-ḳhyāl-o-tang-nazar

bedār azā.em ke sadqe jo kaam haiñ āsāñ hote haiñ

mash.hūr huuñ bazm-e-gītī meñ is fan meñ 'musavvir' kāmil huuñ

tasvīr se zāhir kartā huuñ vo jalve jo pinhāñ hote haiñ

sah sah ke sitam miT jaane mein kya kar-e-numayan hote hain

wo jitne pasheman hote hain aur ishq pe ehsan hote hain

hum soKHta-samanon ke wo ajza-e-pareshan hote hain

jo barq-o-sharar-o-shabnam-o-gul ban ban ke numayan hote hain

main paikar-e-KHaki hun lekin ye KHak kuchh aisi rangin hai

jis KHak ke zarre zarre se tamir gulistan hote hain

shishon ki sada-e-qulqul par hai KHum ki jawaban haq-haq bhi

allah re kya maiKHane ke asrar numayan hote hain

taqdir ka rona rota hai kotah-KHyal-o-tang-nazar

bedar azaem ke sadqe jo kaam hain aasan hote hain

mashhur hun bazm-e-giti mein is fan mein 'musawwir' kaamil hun

taswir se zahir karta hun wo jalwe jo pinhan hote hain