sahar hote hi ahl-e-anjuman ko nind si aai

sahar hote hī ahl-e-anjuman ko niiñd sī aa.ī

añdhere aur gahre ho ga.e jab raushnī aa.ī

dam-e-sair-e-chaman aksar ye manzar ham ne dekhā hai

jidhar tum the udhar phūloñ ke ruḳh par tāzgī aa.ī

sivā.e shorish-e-parvāz sab kuchh hai gulistāñ meñ

bahār aa.ī magar ik daam phailātī huī aa.ī

abhī tak maut se miltā huā ik nashsha taarī thā

tum aa.e zindagī kā hosh aayā zindagī aa.ī

maiñ tark-e-ishq par nāzāñ thā lekin vāqi.a ye hai

ki aaj un kā ḳhayāl aayā to apnī yaad bhī aa.ī

sabab kuchh aur thā merī musalsal tishna-kāmī kā

maiñ ye samjhā ki saaqī kī tavajjoh meñ kamī aa.ī

añdhere meñ haiñ kitne tishnigān-e-mai-kadā 'shāhid'

jahāñ tak daur-e-jām aayā vahīñ tak raushnī aa.ī

sahar hote hi ahl-e-anjuman ko nind si aai

andhere aur gahre ho gae jab raushni aai

dam-e-sair-e-chaman aksar ye manzar hum ne dekha hai

jidhar tum the udhar phulon ke ruKH par tazgi aai

siwae shorish-e-parwaz sab kuchh hai gulistan mein

bahaar aai magar ek dam phailati hui aai

abhi tak maut se milta hua ek nashsha tari tha

tum aae zindagi ka hosh aaya zindagi aai

main tark-e-ishq par nazan tha lekin waqia ye hai

ki aaj un ka KHayal aaya to apni yaad bhi aai

sabab kuchh aur tha meri musalsal tishna-kaami ka

main ye samjha ki saqi ki tawajjoh mein kami aai

andhere mein hain kitne tishnigan-e-mai-kada 'shahid'

jahan tak daur-e-jam aaya wahin tak raushni aai