sahar jab muskurai tab kahin taron ko nind aai

sahar jab muskurā.ī tab kahīñ tāroñ ko niiñd aa.ī

bahut mushkil se kal shab dard ke māroñ ko niiñd aa.ī

sunā hai shaam se hī taak meñ baiThe haiñ sab gulchīñ

qayāmat gul pe aa.egī agar ḳhāroñ ko niiñd aa.ī

hamesha zehn-o-dil meñ kuchh na kuchh chaltā hī rahtā hai

hue jo fikr se ḳhālī to fankāroñ ko niiñd aa.ī

azal se puurī shiddat se ḳhalāoñ meñ muallaq haiñ

kabhī tum ne sunā hai ye ki sayyāroñ ko niiñd aa.ī

musalsal nāz-bardārī se aajiz aa chukā thā maiñ

chalo achchhā huā kam-baḳht āzāroñ ko niiñd aa.ī

ye taḳhlīqī anāsir varna masrūf-e-amal hī the

ga.ī jo ruuh us aalam meñ to chāroñ ko niiñd aa.ī

vagarna 'shād' be-ḳhvābī meñ guzrī zindagī un kī

rukā jab kārvān-e-zīst banjāroñ ko niiñd aa.ī

sahar jab muskurai tab kahin taron ko nind aai

bahut mushkil se kal shab dard ke maron ko nind aai

suna hai sham se hi tak mein baiThe hain sab gulchin

qayamat gul pe aaegi agar KHaron ko nind aai

hamesha zehn-o-dil mein kuchh na kuchh chalta hi rahta hai

hue jo fikr se KHali to fankaron ko nind aai

azal se puri shiddat se KHalaon mein muallaq hain

kabhi tum ne suna hai ye ki sayyaron ko nind aai

musalsal naz-bardari se aajiz aa chuka tha main

chalo achchha hua kam-baKHt aazaron ko nind aai

ye taKHliqi anasir warna masruf-e-amal hi the

gai jo ruh us aalam mein to chaaron ko nind aai

wagarna 'shad' be-KHwabi mein guzri zindagi un ki

ruka jab karwan-e-zist banjaron ko nind aai