sahar ka hosh nahin sham ka KHuda-hafiz

sahar kā hosh nahīñ shaam kā ḳhudā-hāfiz

ye ibtidā hai to anjām kā ḳhudā-hāfiz

sunā na paa.e the ham aur vo muskurā baiThe

hikāyat-e-dil-e-nākām kā ḳhudā-hāfiz

qarār luTtā hai phir bhī duā.eñ detā huuñ

ki jaane vaale ke har gaam kā ḳhudā-hāfiz

hameñ to saḳhtī-e-rāh-e-hayāt raas aa.ī

subuk-ravān-e-rah-e-ām kā ḳhudā-hāfiz

nazar ne chheḌā fasāna to hashr jaag uThā

ma.āl-e-nāma-o-paiġhām kā ḳhudā-hāfiz

koī guzar to rahā hai nazar churā.e hue

tajalliyāt-e-dar-o-bām kā ḳhudā-hāfiz

dhuāñ charāġh-e-haram kā hai ġhāza-e-ruḳhsār

nazāra-sāzī-e-asnām kā ḳhudā-hāfiz

nazar milāne lage bul-havas bhī 'jauhar' se

janāb ke karam-e-ām kā ḳhudā-hāfiz

sahar ka hosh nahin sham ka KHuda-hafiz

ye ibtida hai to anjam ka KHuda-hafiz

suna na pae the hum aur wo muskura baiThe

hikayat-e-dil-e-nakaam ka KHuda-hafiz

qarar luTta hai phir bhi duaen deta hun

ki jaane wale ke har gam ka KHuda-hafiz

hamein to saKHti-e-rah-e-hayat ras aai

subuk-rawan-e-rah-e-am ka KHuda-hafiz

nazar ne chheDa fasana to hashr jag uTha

maal-e-nama-o-paigham ka KHuda-hafiz

koi guzar to raha hai nazar churae hue

tajalliyat-e-dar-o-baam ka KHuda-hafiz

dhuan charagh-e-haram ka hai ghaza-e-ruKHsar

nazara-sazi-e-asnam ka KHuda-hafiz

nazar milane lage bul-hawas bhi 'jauhar' se

janab ke karam-e-am ka KHuda-hafiz