sahar ka nur mera rang-e-sham hai mera

sahar kā nuur mirā rang-e-shām hai merā

unhīñ ke husn kā partav kalām hai merā

tirī nigāh ne jis meñ sharāb chhalkā.ī

kisī ke haath meñ bhī ho vo jaam hai merā

zahe-nasīb ki aaj un hasīn āñkhoñ meñ

har ek ashk-e-daraḳhshāñ pe naam hai merā

mujhe guzishta-o-ā.inda kā malāl ho kyoñ

mizāj-e-gardish-e-daurāñ ġhulām hai merā

azīz-e-misr-e-suḳhan huuñ suḳhnavaroñ se kaho

savād-e-shahr-e-ġhazal meñ qiyām hai merā

fazā fazā mirī gard-e-safar uḌī 'fitrat'

ki dast-e-daur-e-havādis meñ jaam hai merā

sahar ka nur mera rang-e-sham hai mera

unhin ke husn ka partaw kalam hai mera

teri nigah ne jis mein sharab chhalkai

kisi ke hath mein bhi ho wo jam hai mera

zahe-nasib ki aaj un hasin aankhon mein

har ek ashk-e-daraKHshan pe nam hai mera

mujhe guzishta-o-ainda ka malal ho kyon

mizaj-e-gardish-e-dauran ghulam hai mera

aziz-e-misr-e-suKHan hun suKHnawaron se kaho

sawad-e-shahr-e-ghazal mein qiyam hai mera

faza faza meri gard-e-safar uDi 'fitrat'

ki dast-e-daur-e-hawadis mein jam hai mera