sahar ka zikr andhere ki baat hi na hui

sahar kā zikr añdhere kī baat hī na huī

vo jab se aa.e mire ghar meñ raat hī na huī

dayār-e-dil nigah-e-dil-kushā ne luuT liyā

phir is nagar meñ koī vārdāt hī na huī

dil-e-ġharīb ne kyā kyā jatan kiye lekin

sharīk-e-ġham nazar-e-iltifāt hī na huī

hadīs-e-dīda-varāñ hai ki dard-e-dil ke baġhair

ġham-e-jahāñ se kisī ko najāt hī na huī

kamand-e-‘aql kahāñ rūh-e-kā.enāt kahāñ

abhī sarāhat-e-ramz-e-hayāt hī na huī

sahar ka zikr andhere ki baat hi na hui

wo jab se aae mere ghar mein raat hi na hui

dayar-e-dil nigah-e-dil-kusha ne luT liya

phir is nagar mein koi wardat hi na hui

dil-e-gharib ne kya kya jatan kiye lekin

sharik-e-gham nazar-e-iltifat hi na hui

hadis-e-dida-waran hai ki dard-e-dil ke baghair

gham-e-jahan se kisi ko najat hi na hui

kamand-e-‘aql kahan ruh-e-kaenat kahan

abhi sarahat-e-ramz-e-hayat hi na hui