sahar se ek kiran ki faqat talab thi mujhe

sahar se ek kiran kī faqat talab thī mujhe

tamām raat magar bekalī ġhazab thī mujhe

kanār-e-shām pe surḳhī shafaq kī dauḌ ga.ī

lahū ugalne kī yuuñ aarzū bhī kab thī mujhe

pate kī ik na kahī sub.h ke ujāloñ meñ

ye aur baat ki azbar hadīs-e-shab thī mujhe

maiñ terī ruuh kī pahnā.ī meñ utar na sakā

ki tujh se sirf tamannā-e-lab-ba-lab thī mujhe

maiñ ḳhud hī bazm bhī aur ḳhud hī bazm-ārā bhī

ki nāgavār har ik mahfil-e-tarab thī mujhe

maiñ apne vaqt kā suqrāt to nahīñ lekin

jahāñ pe baat chhiḌī phir vahīñ pe shab thī mujhe

maiñ apnī zaat ke andar kabhī na jhāñk sakā

ye aur baat ki ye aarzū bhī kab thī mujhe

fasīl-e-shab se koī ab pukārtā hai to kyā

milā na ek bhī us din talāsh jab thī mujhe

shikāyat-e-shab-e-hijrāñ kabhī na kī 'mohsin'

hikāyat-e-ġham-e-dil varna yaad sab thī mujhe

sahar se ek kiran ki faqat talab thi mujhe

tamam raat magar bekali ghazab thi mujhe

kanar-e-sham pe surKHi shafaq ki dauD gai

lahu ugalne ki yun aarzu bhi kab thi mujhe

pate ki ek na kahi subh ke ujalon mein

ye aur baat ki azbar hadis-e-shab thi mujhe

main teri ruh ki pahnai mein utar na saka

ki tujh se sirf tamanna-e-lab-ba-lab thi mujhe

main KHud hi bazm bhi aur KHud hi bazm-ara bhi

ki nagawar har ek mahfil-e-tarab thi mujhe

main apne waqt ka suqraat to nahin lekin

jahan pe baat chhiDi phir wahin pe shab thi mujhe

main apni zat ke andar kabhi na jhank saka

ye aur baat ki ye aarzu bhi kab thi mujhe

fasil-e-shab se koi ab pukarta hai to kya

mila na ek bhi us din talash jab thi mujhe

shikayat-e-shab-e-hijran kabhi na ki 'mohsin'

hikayat-e-gham-e-dil warna yaad sab thi mujhe