sahar se pahle hi mujhko bujhana chahta hai

sahar se pahle hī mujh ko bujhānā chāhtā hai

vo merī aag ko shabnam banānā chāhtā hai

vo phūl-phūl badan shām-shām sā chehra

utar ke jaan meñ merī samānā chāhtā hai

vo aisī shāḳh-e-samar-dār hai ki dil jis ko

hisār-e-ḳhvāb-o-ḳhatā meñ chhupānā chāhtā hai

chamak rahe haiñ fusūn-e-nazar meñ māh-o-nujūm

badan ke phuul qabā par khilānā chāhtā hai

vo ik sadā hai samā.at pe saaya karne ko

vo ek rang hai jo phail jaanā chāhtā hai

guzartī shab meñ havāoñ se baat kartā hai

vo apne saath sabhī ko jagānā chāhtā hai

hai chuur chuur kaḌī dhuup ke safar se magar

ufuq ke paar kahīñ ghar banānā chāhtā hai

lipaT ke ḳhuub vo rotā hai merī yādoñ se

mujhe ḳhabar hai ki mujh ko bhulānā chāhtā hai

vo chashm-e-ḳhvāb se girtā huā sā ashk-e-numū

zamīn-e-ḳhushk se aañsū ugānā chāhtā hai

jo merī raah meñ qindīl kar gayā raushan

navāh-e-jān meñ jugnū jagānā chāhtā hai

maiñ ek sham-e-sar-e-rah-guzār huuñ 'ajmal'

na jaane kis liye mujh ko bujhānā chāhtā hai

sahar se pahle hi mujh ko bujhana chahta hai

wo meri aag ko shabnam banana chahta hai

wo phul-phul badan sham-sham sa chehra

utar ke jaan mein meri samana chahta hai

wo aisi shaKH-e-samar-dar hai ki dil jis ko

hisar-e-KHwab-o-KHata mein chhupana chahta hai

chamak rahe hain fusun-e-nazar mein mah-o-nujum

badan ke phul qaba par khilana chahta hai

wo ek sada hai samaat pe saya karne ko

wo ek rang hai jo phail jaana chahta hai

guzarti shab mein hawaon se baat karta hai

wo apne sath sabhi ko jagana chahta hai

hai chur chur kaDi dhup ke safar se magar

ufuq ke par kahin ghar banana chahta hai

lipaT ke KHub wo rota hai meri yaadon se

mujhe KHabar hai ki mujh ko bhulana chahta hai

wo chashm-e-KHwab se girta hua sa ashk-e-numu

zamin-e-KHushk se aansu ugana chahta hai

jo meri rah mein qindil kar gaya raushan

nawah-e-jaan mein jugnu jagana chahta hai

main ek sham-e-sar-e-rah-guzar hun 'ajmal'

na jaane kis liye mujh ko bujhana chahta hai