sahar se raat ki sargoshiyan bahaar ki baat

sahar se raat kī sargoshiyāñ bahār kī baat

jahāñ meñ aam huī chashm-e-intizār kī baat

diloñ kī tishnagī jitnī diloñ kā ġham jitnā

usī qadar hai zamāne meñ husn-e-yār kī baat

jahāñ bhī baiThe haiñ jis jā bhī raat mai pī hai

unhī kī āñkhoñ ke qisse unhī ke pyaar kī baat

chaman kī aañkh bhar aa.ī kalī kā dil dhaḌkā

laboñ pe aa.ī hai jab bhī kisī qarār kī baat

ye zard zard ujāle ye raat raat kā dard

yahī to rah ga.ī ab jān-e-be-qarār kī baat

tamām umr chalī hai tamām umr chale

ilāhī ḳhatm na ho yār-e-ġham-gusār kī baat

sahar se raat ki sargoshiyan bahaar ki baat

jahan mein aam hui chashm-e-intizar ki baat

dilon ki tishnagi jitni dilon ka gham jitna

usi qadar hai zamane mein husn-e-yar ki baat

jahan bhi baiThe hain jis ja bhi raat mai pi hai

unhi ki aankhon ke qisse unhi ke pyar ki baat

chaman ki aankh bhar aai kali ka dil dhaDka

labon pe aai hai jab bhi kisi qarar ki baat

ye zard zard ujale ye raat raat ka dard

yahi to rah gai ab jaan-e-be-qarar ki baat

tamam umr chali hai tamam umr chale

ilahi KHatm na ho yar-e-gham-gusar ki baat