sahar ye naddi hai aansuon ki na puchh is ka bahao pyare

sahar ye naddī hai āñsuoñ kī na pūchh is kā bahāo pyāre

ki is ke tūfān-e-mauj-e-ġham meñ bachegī kyā dil kī naav pyāre

mujhe to 'ādat hai ġham kī rāhoñ meñ chalne phirne kī ai sitamgar

magar shabāb-e-sitam kā tere kahāñ hai aglā paḌāv pyāre

ye ranj-o-ġham ye taḌap ye aaheñ ye huzn-o-hirmāñ alam karāheñ

yahī kamāyā hai 'umr bhar to usī kamā.ī ko khaao pyāre

ġhamoñ se kis ko hai rustagārī to kaahe lab pe hai āh-o-zārī

usī ko denā paḌegā marham diyā hai jis ne ye ghaav pyāre

hai ab bhī sābit ki pāra-pāra vo dil ke ranj-o-mehan kā maarā

ġhamoñ se yaarī hai ġham hī yaarā kuchh haal us kā batāo pyāre

tumhārī rūdād-e-dard-e-hastī ye shahr-yārān-e-kaif-o-mastī

kahāñ chale aa.e ho bhaTak ke ye bazm-e-ishrat hai jaao pyāre

mire ḳhayāloñ kī anjuman meñ ġhamoñ kī ik bhiiḌ sī lagī hai

kahāñ base ho ḳhayāl-e-jānāñ ġhazal ke sāñche meñ aao pyāre

jo khul gayā ye dahan to pyāre hilā ke rakh degā anjuman ko

ġhavāmiz-e-ḳhāmushī na pūchho tum apnī mahfil sajāo pyāre

kasād-bāzārī-e-nazar meñ kahāñ thī tahsīn-e-nāz-o-naḳhvat

ye merā bāzār-e-dil thā jis ne baḌhā diyā terā bhaav pyāre

hai sheriyat bhī ġhenā.iyat bhī hai is meñ dā.ūdiyat bhī lekin

ġhazal ke siine meñ rakh diyā hai ye kis ne ġham kā alaav pyāre

tumhārā charchā hai anjuman meñ ḳhamosh baiThe ho kyoñ 'sahar' tum

balā se samjhe na vo sitamgar tum apnā dukhḌā sunāo pyāre

sahar ye naddi hai aansuon ki na puchh is ka bahao pyare

ki is ke tufan-e-mauj-e-gham mein bachegi kya dil ki naw pyare

mujhe to 'adat hai gham ki rahon mein chalne phirne ki ai sitamgar

magar shabab-e-sitam ka tere kahan hai agla paDaw pyare

ye ranj-o-gham ye taDap ye aahen ye huzn-o-hirman alam karahen

yahi kamaya hai 'umr bhar to usi kamai ko khao pyare

ghamon se kis ko hai rustagari to kahe lab pe hai aah-o-zari

usi ko dena paDega marham diya hai jis ne ye ghaw pyare

hai ab bhi sabit ki para-para wo dil ke ranj-o-mehan ka mara

ghamon se yari hai gham hi yara kuchh haal us ka batao pyare

tumhaari rudad-e-dard-e-hasti ye shahr-yaran-e-kaif-o-masti

kahan chale aae ho bhaTak ke ye bazm-e-ishrat hai jao pyare

mere KHayalon ki anjuman mein ghamon ki ek bhiD si lagi hai

kahan base ho KHayal-e-jaanan ghazal ke sanche mein aao pyare

jo khul gaya ye dahan to pyare hila ke rakh dega anjuman ko

ghawamiz-e-KHamushi na puchho tum apni mahfil sajao pyare

kasad-bazari-e-nazar mein kahan thi tahsin-e-naz-o-naKHwat

ye mera bazar-e-dil tha jis ne baDha diya tera bhaw pyare

hai sheriyat bhi ghenaiyat bhi hai is mein daudiyat bhi lekin

ghazal ke sine mein rakh diya hai ye kis ne gham ka alaw pyare

tumhaara charcha hai anjuman mein KHamosh baiThe ho kyon 'sahar' tum

bala se samjhe na wo sitamgar tum apna dukhDa sunao pyare