sahe sitam pe sitam phir bhi muddaa na mila

sahe sitam pe sitam phir bhī mudda.ā na milā

hameñ to dard meñ bhī dard kā mazā na milā

fareb-e-shauq ne nākām-e-justujū rakkhā

talāsh jis kī thī us kā kahīñ patā na milā

vo ḳhaak jaur kī lazzat se āshnā hote

jinheñ ki hausla-e-sabr-āzmā na milā

azal se garm-rav-e-rāh-e-justujū huuñ maiñ

hanūz manzil-e-maqsūd kā patā na milā

tilism-e-dahr meñ ik vahm hai vajūd-e-bashar

hameñ talāsh se apnā bhī kuchh patā na milā

milā ke ḳhaak meñ haiñ be-niyāziyāñ ab tak

tumhārī tarah koī dair-āshnā na milā

banāte kāba-e-maqsūd jis ko ham 'farruḳh'

rah-e-talab meñ koī aisā naqsh-e-pā na milā

sahe sitam pe sitam phir bhi muddaa na mila

hamein to dard mein bhi dard ka maza na mila

fareb-e-shauq ne nakaam-e-justuju rakkha

talash jis ki thi us ka kahin pata na mila

wo KHak jaur ki lazzat se aashna hote

jinhen ki hausla-e-sabr-azma na mila

azal se garm-raw-e-rah-e-justuju hun main

hanuz manzil-e-maqsud ka pata na mila

tilism-e-dahr mein ek wahm hai wajud-e-bashar

hamein talash se apna bhi kuchh pata na mila

mila ke KHak mein hain be-niyaziyan ab tak

tumhaari tarah koi dair-ashna na mila

banate kaba-e-maqsud jis ko hum 'farruKH'

rah-e-talab mein koi aisa naqsh-e-pa na mila