sahn-e-chaman mein baad-e-saba mahw-e-raqs hai

sahn-e-chaman meñ bād-e-sabā mahv-e-raqs hai

yā zehn meñ ḳhayāl tirā mahv-e-raqs hai

sūraj sitāre chāñd zamīn aur āsmāñ

ye saarī kā.enāt ḳhudā mahv-e-raqs hai

har zarra-e-zamīn hai kuchh boltā huā

lagtā hai jaise koī sadā mahv-e-raqs hai

terā ḳhayāl terā tasavvur tirī talab

har dam laboñ pe zikr tirā mahv-e-raqs hai

vo bevafā.iyāñ bhī kare gar to kis tarah

vo jis ke ird-gird vafā mahv-e-raqs hai

'zīshān' terī fikr meñ parvāz kyoñ na ho

ajdād ke suḳhan kī fazā mahv-e-raqs hai

sahn-e-chaman mein baad-e-saba mahw-e-raqs hai

ya zehn mein KHayal tera mahw-e-raqs hai

suraj sitare chand zamin aur aasman

ye sari kaenat KHuda mahw-e-raqs hai

har zarra-e-zamin hai kuchh bolta hua

lagta hai jaise koi sada mahw-e-raqs hai

tera KHayal tera tasawwur teri talab

har dam labon pe zikr tera mahw-e-raqs hai

wo bewafaiyan bhi kare gar to kis tarah

wo jis ke ird-gird wafa mahw-e-raqs hai

'zishan' teri fikr mein parwaz kyon na ho

ajdad ke suKHan ki faza mahw-e-raqs hai