sahn-e-ehsas mein ek naqsh nihan tha pahle

sahn-e-ehsās meñ ik naqsh nihāñ thā pahle

tū nahīñ thā tire hone kā gumāñ thā pahle

tah-ba-tah chaar sū ḳhush-rañg sadā raushan thī

mujh se pahle bhī koī jaise yahāñ thā pahle

vo bhī sahrā kī sadāoñ meñ giraftār rahā

aur mujh meñ bhī koī reg-e-ravāñ thā pahle

vaqt ne kar diyā patthar kī lahad meñ tabdīl

apnā chhoTā sā jo miTTī kā makāñ thā pahle

ab to ā.īna-e-ehsās hai be-aks-e-jamāl

mujh se chhup kar bhī koī mujh pe ayaañ thā pahle

vo nahīñ thā to na thā us kī zarūrat kyā thī

apne hone kā bhī ehsās kahāñ thā pahle

roz-o-shab sahte rahe TūTte lamhoñ kā itaab

koī ḳhanjar sā qarīb-e-rag-e-jāñ thā pahle

aap kī ham-safarī ne safar āsān kiyā

varna har gaam yahāñ koh-e-girāñ thā pahle

ḳhush-bayānī ne kisī kī mujhe ḳhush-rañg kiyā

apnā kuchh aur hī andāz-e-bayāñ thā pahle

un se milte hī har ik ġham se milī 'nāz' najāt

zindagī kā ye hasīñ chehra kahāñ thā pahle

sahn-e-ehsas mein ek naqsh nihan tha pahle

tu nahin tha tere hone ka guman tha pahle

tah-ba-tah chaar su KHush-rang sada raushan thi

mujh se pahle bhi koi jaise yahan tha pahle

wo bhi sahra ki sadaon mein giraftar raha

aur mujh mein bhi koi reg-e-rawan tha pahle

waqt ne kar diya patthar ki lahad mein tabdil

apna chhoTa sa jo miTTi ka makan tha pahle

ab to aaina-e-ehsas hai be-aks-e-jamal

mujh se chhup kar bhi koi mujh pe ayan tha pahle

wo nahin tha to na tha us ki zarurat kya thi

apne hone ka bhi ehsas kahan tha pahle

roz-o-shab sahte rahe TuTte lamhon ka itab

koi KHanjar sa qarib-e-rag-e-jaan tha pahle

aap ki ham-safari ne safar aasan kiya

warna har gam yahan koh-e-giran tha pahle

KHush-bayani ne kisi ki mujhe KHush-rang kiya

apna kuchh aur hi andaz-e-bayan tha pahle

un se milte hi har ek gham se mili 'naz' najat

zindagi ka ye hasin chehra kahan tha pahle