صحن گل رنگ سے آنکھوں کی رفاقت ہے ابھی

صحن گل رنگ سے آنکھوں کی رفاقت ہے ابھی

نیند ٹوٹی ہے مگر خواب سلامت ہے ابھی

بے سبب تو نہیں چہرے پہ تھکن کے آثار

دوش احساس پہ اک بار امانت ہے ابھی

درد و غم نغمہ سرا ہیں مری شریانوں میں

ایک اک سانس مری محو عبادت ہے ابھی

رنگ کیا روشنی تصویر ہوئی جاتی ہے

لمحۂ ہجر مسلسل کی عنایت ہے ابھی

کون سا مونس و غم خوار کہاں کا ہم زاد

خود مری ذات پس گرد مسافت ہے ابھی

بے خودی کیوں نہ کرے رقص مرے پیکر میں

زخم روشن ہیں مرے درد میں لذت ہے ابھی

جانے کس موڑ پہ دامان ہوس پھیلا دے

رازؔ یہ قلب جو مائل بہ قناعت ہے ابھی