sahra-e-KHayal ka diya hun

sahrā-e-ḳhayāl kā diyā huuñ

vīrāna-e-shab meñ jal rahā huuñ

sāġhar kī tarah se chuur ho kar

mahfil meñ bikhar bikhar gayā huuñ

apne hī lahū kī raushnī meñ

nairañg-e-jahāñ ko dekhtā huuñ

vo chāñd huuñ gardishoñ meñ aa kar

ḳhud apnī nazar se kaT gayā huuñ

har ahd hai mere dam se rañgīn

maiñ naġhma-e-sāz-e-irtiqā huuñ

ā.īna-sifat nazar se terī

aks-e-dar-o-bām ban gayā huuñ

ehsās kī talḳhiyoñ meñ Dhal kar

maiñ dard kā chāñd ban gayā huuñ

sun lo mujhe mai-kada-parasto!

bhīgī huī raat kī sadā huuñ

gulzār meñ rah ke bhī 'razā' maiñ

ḳhushbū ke liye taras gayā huuñ

sahra-e-KHayal ka diya hun

virana-e-shab mein jal raha hun

saghar ki tarah se chur ho kar

mahfil mein bikhar bikhar gaya hun

apne hi lahu ki raushni mein

nairang-e-jahan ko dekhta hun

wo chand hun gardishon mein aa kar

KHud apni nazar se kaT gaya hun

har ahd hai mere dam se rangin

main naghma-e-saz-e-irtiqa hun

aaina-sifat nazar se teri

aks-e-dar-o-baam ban gaya hun

ehsas ki talKHiyon mein Dhal kar

main dard ka chand ban gaya hun

sun lo mujhe mai-kada-parasto!

bhigi hui raat ki sada hun

gulzar mein rah ke bhi 'raza' main

KHushbu ke liye taras gaya hun