sahra ka koi phul moattar to nahin tha

sahrā kā koī phuul mo'attar to nahīñ thā

thā ek chhalāvā koī manzar to nahīñ thā

phir kyuuñ tirī tasvīr Dhalī ruuh meñ merī

afsūñ tirī āñkhoñ kā musavvar to nahīñ thā

ban kar mirā apnā vo banā hasrat-e-jāved

thā ḳhaak kā putlā hī muqaddar to nahīñ thā

maiñ bhī tirī ḳhalvat kā koī naaz churātā

aisā koī qismat kā sikandar to nahīñ thā

afsāna tirī zulf kā ai jān-e-tamannā

maiñ kaise sunātā mujhe azbar to nahīñ thā

talḳhāba-e-dil thā ki havādis kā sharar thā

fariyād na kartā koī patthar to nahīñ thā

ḳhud aag meñ apnī hī maiñ jaltā rahā aksar

bargashta maiñ tujh se mire dāvar to nahīñ thā

ham ne bhī 'azīm' aaj ġhazal terī sunī hai

uslūb-e-bayāñ terā muassar to nahīñ thā

sahra ka koi phul mo'attar to nahin tha

tha ek chhalawa koi manzar to nahin tha

phir kyun teri taswir Dhali ruh mein meri

afsun teri aankhon ka musawwar to nahin tha

ban kar mera apna wo bana hasrat-e-jawed

tha KHak ka putla hi muqaddar to nahin tha

main bhi teri KHalwat ka koi naz churaata

aisa koi qismat ka sikandar to nahin tha

afsana teri zulf ka ai jaan-e-tamanna

main kaise sunata mujhe azbar to nahin tha

talKHaba-e-dil tha ki hawadis ka sharar tha

fariyaad na karta koi patthar to nahin tha

KHud aag mein apni hi main jalta raha aksar

bargashta main tujh se mere dawar to nahin tha

hum ne bhi 'azim' aaj ghazal teri suni hai

uslub-e-bayan tera muassar to nahin tha