sahra ki be-ab zamin par ek chaman tayyar kiya

sahrā kī be-āb zamīñ par ek chaman tayyār kiyā

apne lahū se sīñch ke ham ne miTTī ko gulzār kiyā

yuuñ ham apne ghar se nikle ghar ham ko taktā hī rahā

ham ne adā bhīgī āñkhoñ se qarz-e-dar-o-dīvār kiyā

kitnī āñkheñ shauq-e-sarāpā kitne chehre harf-e-savāl

jaane phir kyā soch ke ham ne ḳhud ko tirā bīmār kiyā

tum na kaho tārīḳh kahegī ham haiñ kis me.aar ke log

patthar khaa.e phuul tarāshe rāhoñ ko hamvār kiyā

sho.ale lapke jab bhī ham ko barkhā-rut kī yaad aa.ī

āñkheñ barsīñ jab bhī ham ne zikr-e-lab-o-ruḳhsār kiyā

ek hī ruḳh tak apnā mizāj-e-zauq-e-vafā mahdūd nahīñ

rañg diyā mai-ḳhāne ko bhī maqtal se bhī pyaar kiyā

rasm-e-mohabbat 'shā.ir' ham ko chaltī huī talvār banī

jis ko banāyā ham ne apnā us ne hamīñ par vaar kiyā

sahra ki be-ab zamin par ek chaman tayyar kiya

apne lahu se sinch ke hum ne miTTi ko gulzar kiya

yun hum apne ghar se nikle ghar hum ko takta hi raha

hum ne ada bhigi aankhon se qarz-e-dar-o-diwar kiya

kitni aankhen shauq-e-sarapa kitne chehre harf-e-sawal

jaane phir kya soch ke hum ne KHud ko tera bimar kiya

tum na kaho tariKH kahegi hum hain kis mear ke log

patthar khae phul tarashe rahon ko hamwar kiya

shoale lapke jab bhi hum ko barkha-rut ki yaad aai

aankhen barsin jab bhi hum ne zikr-e-lab-o-ruKHsar kiya

ek hi ruKH tak apna mizaj-e-zauq-e-wafa mahdud nahin

rang diya mai-KHane ko bhi maqtal se bhi pyar kiya

rasm-e-mohabbat 'shair' hum ko chalti hui talwar bani

jis ko banaya hum ne apna us ne hamin par war kiya