صحرا کی وسعتوں میں اک سائباں نہیں ہے

صحرا کی وسعتوں میں اک سائباں نہیں ہے

اتنے بڑے جہاں میں اک راز داں نہیں ہے

میری زباں تو چپ ہے لیکن تجھے بتا دوں

صدیوں میں مٹنے والی یہ داستاں نہیں ہے

بے مول بک رہا ہوں تاریک سی گلی میں

اہل نظر سے لیکن جوہر نہاں نہیں ہے

تیرا عیاں ہو جلوہ اور ضبط بھی ہو لازم

کیا حوصلہ ہے جس کے لب پر فغاں نہیں ہے

میرا جہاں سجا دے جادو تری نظر کا

بدلہ اسی عطا کا سارا جہاں نہیں ہے

جو بے ہنر ہیں ان میں رتبے بٹے ہوئے ہیں

اہل ہنر کا پرساں کوئی یہاں نہیں ہے

غم میں نہ ڈوب شاہیںؔ خوشیاں بھی دیکھ اپنی

انساں نہیں جو دل پر غم کا نشاں نہیں ہے