sahra ki wusaton mein ek saeban nahin hai

sahrā kī vus.atoñ meñ ik sā.ebāñ nahīñ hai

itne baḌe jahāñ meñ ik rāzdāñ nahīñ hai

merī zabāñ to chup hai lekin tujhe batā duuñ

sadiyoñ meñ miTne vaalī ye dāstāñ nahīñ hai

be-mol bik rahā huuñ tārīk sī galī meñ

ahl-e-nazar se lekin jauhar nihāñ nahīñ hai

terā ayaañ ho jalva aur zabt bhī ho lāzim

kyā hausla hai jis ke lab par fuġhāñ nahīñ hai

merā jahāñ sajā de jaadū tirī nazar kā

badla usī atā kā saarā jahāñ nahīñ hai

jo be-hunar haiñ un meñ rutbe baTe hue haiñ

ahl-e-hunar kā pursāñ koī yahāñ nahīñ hai

ġham meñ na Duub 'shāhīñ' ḳhushiyāñ bhī dekh apnī

insāñ nahīñ jo dil par ġham kā nishāñ nahīñ hai

sahra ki wusaton mein ek saeban nahin hai

itne baDe jahan mein ek raazdan nahin hai

meri zaban to chup hai lekin tujhe bata dun

sadiyon mein miTne wali ye dastan nahin hai

be-mol bik raha hun tarik si gali mein

ahl-e-nazar se lekin jauhar nihan nahin hai

tera ayan ho jalwa aur zabt bhi ho lazim

kya hausla hai jis ke lab par fughan nahin hai

mera jahan saja de jadu teri nazar ka

badla usi ata ka sara jahan nahin hai

jo be-hunar hain un mein rutbe baTe hue hain

ahl-e-hunar ka pursan koi yahan nahin hai

gham mein na Dub 'shahin' KHushiyan bhi dekh apni

insan nahin jo dil par gham ka nishan nahin hai