sahra mein hai qarar na sehn-e-chaman mein hai

sahrā meñ hai qarār na sehn-e-chaman meñ hai

jab se dil-e-ḳharāb tirī anjuman meñ hai

ye barhamī jo zulf-e-shikan-dar-shikan meñ hai

shāyad koī kamī mire dīvāna-pan meñ hai

jo kārvāñ bhī aayā yahīñ kā vo ho rahā

kyā jaane kyā kashish mirī ḳhāk-e-vatan meñ hai

rag rag meñ jaise barq-e-tapāñ dauḌne lagī

koī kashish to qissa-e-dār-o-rasan meñ hai

vo bazm-e-nāz bā.is-e-āzār hī sahī

dil ko magar qarār isī anjuman meñ hai

phūloñ ko ho sakī na mah-o-mehr ko nasīb

jalvoñ kī jo bahār tire pairahan meñ hai

ye kaun tishna kaam gulistāñ meñ aa gayā

bū-e-sharāb barg-e-gul-o-yāsman meñ hai

sahra mein hai qarar na sehn-e-chaman mein hai

jab se dil-e-KHarab teri anjuman mein hai

ye barhami jo zulf-e-shikan-dar-shikan mein hai

shayad koi kami mere diwana-pan mein hai

jo karwan bhi aaya yahin ka wo ho raha

kya jaane kya kashish meri KHak-e-watan mein hai

rag rag mein jaise barq-e-tapan dauDne lagi

koi kashish to qissa-e-dar-o-rasan mein hai

wo bazm-e-naz bais-e-azar hi sahi

dil ko magar qarar isi anjuman mein hai

phulon ko ho saki na mah-o-mehr ko nasib

jalwon ki jo bahaar tere pairahan mein hai

ye kaun tishna kaam gulistan mein aa gaya

bu-e-sharab barg-e-gul-o-yasman mein hai