sahra mein kaDi dhup ka Dar hote hue bhi

sahrā meñ kaḌī dhuup kā Dar hote hue bhī

saa.e se gurezāñ huuñ shajar hote hue bhī

maañ baap kā manzūr-e-nazar hote hue bhī

mahrūm-e-virāsat huuñ pisar hote hue bhī

ye jabr-e-mashiyat hai kī tanhā.ī kī aadat

maiñ qaid huuñ dīvār meñ dar hote hue bhī

ham aise parindoñ kī hai ik peḌ se nisbat

uḌ kar kahīñ jaate nahīñ par hote hue bhī

har chiiz luTā denā faqīroñ kā hai sheva

kam-zarf haiñ kuchh sāhab-e-zar hote hue bhī

is des kā baasī huuñ kī jis des kā haarī

māyūs hai shāḳhoñ pe samar hote hue bhī

sūraj se kare dostī ik kor basar kyā

jalve kī nahīñ tāb-e-nazar hote hue bhī

kuchh haar ga.e jabr ke bā-vasf bhī zālim

kuchh jiit ga.e nezoñ pe sar hote hue bhī

tujh jaisā adad apne ta.iiñ kuchh bhī nahīñ hai

maiñ terī zarūrat huuñ sifar hote hue bhī

hañsnā mirī āñkhoñ kā gavārā nahīñ us ko

aur dekh nahīñ saktā hai tar hote hue bhī

phir dasht-navardī ne dikhā.ī ye karāmat

maiñ shahr meñ thā shahr-badar hote hue bhī

is baar the kuchh dost mire madd-e-muqābil

siine pe sahe vaar sipar hote hue bhī

aise bhī zabūñ-hāl ka.ī log haiñ 'kāshir'

be-ghar haiñ isī shahr meñ ghar hote hue bhī

sahra mein kaDi dhup ka Dar hote hue bhi

sae se gurezan hun shajar hote hue bhi

man bap ka manzur-e-nazar hote hue bhi

mahrum-e-wirasat hun pisar hote hue bhi

ye jabr-e-mashiyat hai ki tanhai ki aadat

main qaid hun diwar mein dar hote hue bhi

hum aise parindon ki hai ek peD se nisbat

uD kar kahin jate nahin par hote hue bhi

har chiz luTa dena faqiron ka hai shewa

kam-zarf hain kuchh sahab-e-zar hote hue bhi

is des ka basi hun ki jis des ka haari

mayus hai shaKHon pe samar hote hue bhi

suraj se kare dosti ek kor basar kya

jalwe ki nahin tab-e-nazar hote hue bhi

kuchh haar gae jabr ke ba-wasf bhi zalim

kuchh jit gae nezon pe sar hote hue bhi

tujh jaisa adad apne tain kuchh bhi nahin hai

main teri zarurat hun sifar hote hue bhi

hansna meri aankhon ka gawara nahin us ko

aur dekh nahin sakta hai tar hote hue bhi

phir dasht-nawardi ne dikhai ye karamat

main shahr mein tha shahr-badar hote hue bhi

is bar the kuchh dost mere madd-e-muqabil

sine pe sahe war sipar hote hue bhi

aise bhi zabun-haal kai log hain 'kashir'

be-ghar hain isi shahr mein ghar hote hue bhi