sahra pe gar junun mujhe lawe itab mein

sahrā pe gar junūñ mujhe laave itaab meñ

khīñchūñ har ek ḳhaar ko pā-e-hisāb meñ

is barq kī tarah se ki ho vo sahāb meñ

ātish dī baḳht-e-bad ne mujhe ain aab meñ

dekhī thī zulf raat kisī kī maiñ ḳhvāb meñ

ab tak hai baal baal mirā pech-o-tāb meñ

Tuk ġhaur kar tū bū-qalmoñ kā falak ke Dol

ik rañg hai nayā hī har ik inqalāb meñ

us shola-ḳhū se kasb-e-harārat kare hai daaġh

zarra hai jis kā soz-e-dil-e-āftāb meñ

mai pī jo chāhe ātish-e-dozaḳh se tū najāt

jaltā nahīñ vo uzv jo tar ho sharāb meñ

juuñ mauj mujh se mūjib-e-be-tāqatī na pūchh

ik umr hai ki huuñ maiñ isī iztirāb meñ

qaazī ḳhabar le mai ko bhī likkhā hai vaañ mubāh

rishvat kā hai javāz tirī jis kitāb meñ

roz-e-shumār go ho mire saath bāz-purs

maiñ kyā huuñ aur mere gunah kis hisāb meñ

ye sar-kashī hai utnī tanik mā.egī pe kyā

jhamkā nahīñ hai bahr agar is sahāb meñ

kyā kiije hove chashm miyāñ terī hī jo kor

zāhir hai varna husn vahī har naqāb meñ

nāseh na taaza ishq kī maiñ vaz.a kī hai raah

har kuchh kare hai aadmī ahd-e-shabāb meñ

qaa.em hai ye bhī taur koī zindagī kā yaañ

guzrī tamām umr tirī ḳhūr-o-ḳhvāb meñ

'qā.em' ho kis tarah se baham shakl-e-iḳhtilāt

vo is ġhurūr-e-nāz meñ ham is hijāb meñ

sahra pe gar junun mujhe lawe itab mein

khinchun har ek KHar ko pa-e-hisab mein

is barq ki tarah se ki ho wo sahab mein

aatish di baKHt-e-bad ne mujhe ain aab mein

dekhi thi zulf raat kisi ki main KHwab mein

ab tak hai baal baal mera pech-o-tab mein

Tuk ghaur kar tu bu-qalmon ka falak ke Dol

ek rang hai naya hi har ek inqalab mein

us shola-KHu se kasb-e-hararat kare hai dagh

zarra hai jis ka soz-e-dil-e-aftab mein

mai pi jo chahe aatish-e-dozaKH se tu najat

jalta nahin wo uzw jo tar ho sharab mein

jun mauj mujh se mujib-e-be-taqati na puchh

ek umr hai ki hun main isi iztirab mein

qazi KHabar le mai ko bhi likkha hai wan mubah

rishwat ka hai jawaz teri jis kitab mein

roz-e-shumar go ho mere sath baz-purs

main kya hun aur mere gunah kis hisab mein

ye sar-kashi hai utni tanik maegi pe kya

jhamka nahin hai bahr agar is sahab mein

kya kije howe chashm miyan teri hi jo kor

zahir hai warna husn wahi har naqab mein

naseh na taza ishq ki main waza ki hai rah

har kuchh kare hai aadmi ahd-e-shabab mein

qaem hai ye bhi taur koi zindagi ka yan

guzri tamam umr teri KHur-o-KHwab mein

'qaem' ho kis tarah se baham shakl-e-iKHtilat

wo is ghurur-e-naz mein hum is hijab mein