سعئ غم چشم شرر بار تک آ پہنچی ہے

سعئ غم چشم شرر بار تک آ پہنچی ہے

خامشی جرأت اظہار تک آ پہنچی ہے

اب کہاں ہم میں وہ اگلا سا نیاز و تسلیم

بات ان سے حد تکرار تک آ پہنچی ہے

محترم چارہ گرو اب بھی نہ سمجھو تو حیف

دل کی الجھن رخ بیمار تک آ پہنچی ہے

کیوں نہ رہ جائے پگھل کر سر و سامان حیات

گرمیٔ حسن بھی بازار تک آ پہنچی ہے

ہم نے چھیڑا تھا کبھی قصۂ زلف و مژگاں

بات بڑھ کر رسن و دار تک آ پہنچی ہے

ہے یہی وقت سنبھلنے کا سنبھل جا ناداں

مستیٔ جور جفا کار تک آ پہنچی ہے

زندگی کثرت اقرار سے گھبرا کے شفیقؔ

دیکھیے وحدت انکار تک آ پہنچی ہے