sai-e-gham chashm-e-sharar-bar tak aa pahunchi hai

sa.ī-e-ġham chashm-e-sharar-bār tak aa pahuñchī hai

ḳhāmushī jur.at-e-iz.hār tak aa pahuñchī hai

ab kahāñ ham meñ vo aglā sā niyāz-o-taslīm

baat un se had-e-takrār tak aa pahuñchī hai

mohtaram chāra-garo ab bhī na samjho to haif

dil kī uljhan ruḳh-e-bīmār tak aa pahuñchī hai

kyoñ na rah jaa.e pighal kar sar-o-sāmān-e-hayāt

garmī-e-husn bhī bāzār tak aa pahuñchī hai

ham ne chheḌā thā kabhī qissa-e-zulf-o-mizhgāñ

baat baḌh kar rasan-o-dār tak aa pahuñchī hai

hai yahī vaqt sañbhalne kā sañbhal jā nādāñ

mastī-e-jaur jafā-kār tak aa pahuñchī hai

zindagī kasrat-e-iqrār se ghabrā ke 'shafīq'

dekhiye vahdat-e-inkār tak aa pahuñchī hai

sai-e-gham chashm-e-sharar-bar tak aa pahunchi hai

KHamushi jurat-e-izhaar tak aa pahunchi hai

ab kahan hum mein wo agla sa niyaz-o-taslim

baat un se had-e-takrar tak aa pahunchi hai

mohtaram chaara-garo ab bhi na samjho to haif

dil ki uljhan ruKH-e-bimar tak aa pahunchi hai

kyon na rah jae pighal kar sar-o-saman-e-hayat

garmi-e-husn bhi bazar tak aa pahunchi hai

hum ne chheDa tha kabhi qissa-e-zulf-o-mizhgan

baat baDh kar rasan-o-dar tak aa pahunchi hai

hai yahi waqt sanbhalne ka sanbhal ja nadan

masti-e-jaur jafa-kar tak aa pahunchi hai

zindagi kasrat-e-iqrar se ghabra ke 'shafiq'

dekhiye wahdat-e-inkar tak aa pahunchi hai