sainkaDon sar teri chaukhaT pe dhare milte hain

saiñkaḌoñ sar tirī chaukhaT pe dhare milte haiñ

tere kūche meñ jo milte haiñ mare milte haiñ

kis qadar duur haiñ mazmūn tire choTī ke

fikr ko arsh se do haath pare milte haiñ

naqd-e-dil le ke bhī bosa nahīñ dete hargiz

sīm-tan jo mujhe milte haiñ khare milte haiñ

kahte haiñ iid ko vo haath meñ ḳhanjar le kar

koī milne kī tamanna to kare milte haiñ

pur-ġhazab rahte haiñ aġhyār se ḳhālī ho kar

mujh se jis vaqt vo milte haiñ bhare milte haiñ

āñkhoñ kī raah se vo dil meñ samā.eñ kyūñkar

saḳht mushkil hai ki do tiin dare milte haiñ

sub.h kar dī shab-e-vasl us ne ye dam de de kar

terī qismat ke jo bose haiñ are milte haiñ

be-ḳhudī ne hameñ pheñkā hai bahut duur buto

tum se kyā apne se ham aap pare milte haiñ

yaad rahtī hai kisī shoḳh kī dhānī poshāk

mujh ko har vaqt mire zaḳhm hare milte haiñ

naqd-e-īmān pe de shaiḳh kī jhūTī saaqī

maal khoTā hai magar daam khare milte haiñ

chāvḌī qaaf hai yā ḳhuld-e-barīñ hai 'rāsiḳh'

jamghaTe hūroñ ke pariyoñ ke pare milte haiñ

sainkaDon sar teri chaukhaT pe dhare milte hain

tere kuche mein jo milte hain mare milte hain

kis qadar dur hain mazmun tere choTi ke

fikr ko arsh se do hath pare milte hain

naqd-e-dil le ke bhi bosa nahin dete hargiz

sim-tan jo mujhe milte hain khare milte hain

kahte hain id ko wo hath mein KHanjar le kar

koi milne ki tamanna to kare milte hain

pur-ghazab rahte hain aghyar se KHali ho kar

mujh se jis waqt wo milte hain bhare milte hain

aankhon ki rah se wo dil mein samaen kyunkar

saKHt mushkil hai ki do tin dare milte hain

subh kar di shab-e-wasl us ne ye dam de de kar

teri qismat ke jo bose hain are milte hain

be-KHudi ne hamein phenka hai bahut dur buto

tum se kya apne se hum aap pare milte hain

yaad rahti hai kisi shoKH ki dhani poshak

mujh ko har waqt mere zaKHm hare milte hain

naqd-e-iman pe de shaiKH ki jhuTi saqi

mal khoTa hai magar dam khare milte hain

chawDi qaf hai ya KHuld-e-barin hai 'rasiKH'

jamghaTe huron ke pariyon ke pare milte hain