sair ke qabil hai dil-sad-para us naKHchir ka

sair ke qābil hai dil-sad-pāra us naḳhchīr kā

jis ke har TukḌe meñ ho paivast paikāñ tiir kā

sab khulā bāġh-e-jahāñ illā ye hairān-o-ḳhafā

jis ko dil samjhe the ham so ġhuncha thā tasvīr kā

bū-e-ḳhūñ se jī rukā jaatā hai ai bād-e-bahār

ho gayā hai chaak dil shāyad kaso dil-gīr kā

kyūñke naqqāsh-e-azal ne naqsh abrū kā kiyā

kaam hai ik tere muñh par khīñchnā shamshīr kā

rahguzar sail-e-havādis kā hai be-buniyād-e-dahr

is ḳharābe meñ na karnā qasd tum ta.amīr kā

bas tabīb uTh jā mirī bālīñ se mat de dard-e-sar

kaam yaañ āḳhir huā ab fā.eda tadbīr kā

nāla-kash haiñ ahd-e-pīrī meñ bhī tere dar pe ham

qadd-e-ḳham-gashta hamārā halqa hai zanjīr kā

jo tire kūche meñ aayā phir vahīñ gaaḌā use

tishna-e-ḳhūñ meñ to huuñ us ḳhāk-e-dāman-gīr kā

ḳhuun se mere huī yak-dam ḳhushī tum ko to lek

muft meñ jaatā rahā jī ek be-taqsīr kā

laḳht-e-dil se juuñ chhiḌī phūloñ kī gūñdhī hai vale

fā.eda kuchh ai jigar is āh-e-be-tāsīr kā

gor-e-majanūñ se na jāveñge kahīñ ham be-navā

aib hai ham meñ jo chhoḌeñ Dher apne piir kā

kis tarah se māniye yaaro ki ye āshiq nahīñ

rañg uḌā jaatā hai Tak chehra to dekho 'mīr' kā

sair ke qabil hai dil-sad-para us naKHchir ka

jis ke har TukDe mein ho paiwast paikan tir ka

sab khula bagh-e-jahan illa ye hairan-o-KHafa

jis ko dil samjhe the hum so ghuncha tha taswir ka

bu-e-KHun se ji ruka jata hai ai baad-e-bahaar

ho gaya hai chaak dil shayad kaso dil-gir ka

kyunke naqqash-e-azal ne naqsh abru ka kiya

kaam hai ek tere munh par khinchna shamshir ka

rahguzar sail-e-hawadis ka hai be-buniyaad-e-dahr

is KHarabe mein na karna qasd tum tamir ka

bas tabib uTh ja meri baalin se mat de dard-e-sar

kaam yan aaKHir hua ab faeda tadbir ka

nala-kash hain ahd-e-piri mein bhi tere dar pe hum

qadd-e-KHam-gashta hamara halqa hai zanjir ka

jo tere kuche mein aaya phir wahin gaDa use

tishna-e-KHun mein to hun us KHak-e-daman-gir ka

KHun se mere hui yak-dam KHushi tum ko to lek

muft mein jata raha ji ek be-taqsir ka

laKHt-e-dil se jun chhiDi phulon ki gundhi hai wale

faeda kuchh ai jigar is aah-e-be-tasir ka

gor-e-majanun se na jawenge kahin hum be-nawa

aib hai hum mein jo chhoDen Dher apne pir ka

kis tarah se maniye yaro ki ye aashiq nahin

rang uDa jata hai Tak chehra to dekho 'mir' ka